അന്താരാഷ്ട്ര ഫുട്‌ബോള്‍ മാമാങ്കത്തിന് വീണ്ടും വേദിയായി ഇന്ത്യ. 17 വയസിന് താഴെയുളള പെണ്‍കുട്ടികളുടെ ലോകകപ്പാണ് ഇന്ന് ആരംഭിക്കുന്നത്. ആതിഥേയരായ നമ്മള്‍ ഇന്ന് അമേരിക്കയെയാണ് നേരിടുന്നത്.
കാത്തിരിപ്പിനും അനിശ്ചിതത്വങ്ങള്‍ക്കുമോടുവിലാണ് രാജ്യത്ത് വീണ്ടും കാല്‍പ്പന്താരവം വരുന്നത്. കൊവിഡ് പ്രതിസന്ധിയും, ഫിഫയുടെ വിലക്കും മറികടന്നാണ് ഇന്ന് അണ്ടര്‍ 17 വനിതകളുടെ ലോകകപ്പില്‍ പന്തുരുളുന്നത്. 16 ടീമുകള്‍ മൂന്ന് വേദികളിലായി ലോകകിരീടത്തിനായി മത്സരിക്കും.
ബ്രസീലും അമേരിക്കയും അടങ്ങുന്ന ഗ്രൂപ്പിലാണ് ഇന്ത്യയുളളത്. ഇന്ന് നടക്കുന്ന ആദ്യ മത്സരത്തില്‍ വൈകീട്ട് 4.30ന് ബ്രസീല്‍ മോറോക്കോയെ നേരിടും. ഇതേ സമയത്ത് തന്നെ ന്യൂസീലന്‍ഡ് ചിലയെ നേരിടും. ഇന്ത്യയുടെ ആദ്യ മത്സരം രാത്രി 8 മണിക്ക് കരുത്തരായ അമേരിക്കയ്‌ക്കെതിരെയാണ്.
ആതിഥേയരെന്ന നിലയിലാണ് ഇന്ത്യ ലോകകപ്പില്‍ പന്ത് തട്ടുന്നത്. ഇന്ത്യ അടങ്ങുന്ന ഗ്രൂപ്പ് എ യിലെ മത്സരങ്ങള്‍ ഓഡീഷയിലെ കലിംങ്ക സ്‌റ്റേഡിയത്തിലും, ഗ്രൂപ്പ് ബിയിലെ മത്സരങ്ങള്‍ ഗോവ ഫട്ടോര്‍ഡ സ്‌റ്റേഡിയത്തിലും, ഗ്രൂപ്പ് സി യിലെ മത്സരങ്ങള്‍ മുംബൈ ഡി വൈ പാട്ടീല്‍ സ്‌റ്റേഡിയത്തിലും നടക്കും. ഓക്ടോബര്‍ 30ന് മുംബൈയിലാണ് ഫൈനല്‍.
