💐💐റ്റി.ആര്‍ ശിവശങ്കര പണിക്കര്‍ അന്തരിച്ചു

ചെങ്ങന്നൂര്‍ ▪️ പ്രശസ്ത നാദസ്വര വിദ്വാന്‍ കീഴ്ചരി മേൽ കടക്കിലേത്ത് റ്റി.ആര്‍ ശിവശങ്കര പണിക്കര്‍ (100) അന്തരിച്ചു. സംസ്‌ക്കാരം വീട്ടുവളപ്പില്‍ നടത്തി.

ഭാര്യ: പരേതയായ സുമതികുട്ടിയമ്മ
മക്കള്‍: സുജാത,സുലേഖ, പരേതരായ മോഹനന്‍, രാജന്‍ (ഫെഡറല്‍ ബാങ്ക്)

ശബരിമല മുന്‍ മേല്‍ശാന്തി പരേതനായ ഗോപാലകൃഷ്ണ പോറ്റി (കുട്ടമണി) ആയിരുന്നു നാദസ്വരത്തില്‍ അദ്ദേഹത്തിന്റെ ഗുരു.. പതിനഞ്ചാം വയസ്സില്‍ തമിഴ്‌നാട്ടില്‍ എത്തി വേദാരണ്യ വേദമൂര്‍ത്തി, അറപ്പുക്കോട്ട ഗണേശപിള്ള തുടങ്ങിയ ഗുരുക്കന്മാരുടെ കീഴില്‍ നാദസ്വരം അഭ്യസിച്ച ശേഷം അനുജന്‍ ബാലകൃഷ്ണപ്പണിക്കരുമായി ചേര്‍ന്ന് ‘ചെങ്ങന്നൂര്‍ ബ്രദേഴ്‌സ് ‘ എന്ന പേരില്‍ കേരളത്തിലേയും തമിഴ്‌നാട്ടിലേയും പ്രശസ്തമായ ക്ഷേത്രങ്ങളില്‍ കച്ചേരികള്‍ അവതരിപ്പിച്ചു.

ചെങ്ങന്നൂര്‍ മഹാദേവ ക്ഷേത്രത്തില്‍ ഉത്സവ നാളുകളില്‍ 57 സേവകളില്‍ നാദസ്വര വിദ്വാനായി. അന്നൊരിക്കല്‍ ക്ഷേത്രത്തിലെത്തിയ ദിവാന്‍ സി.പി രാമസ്വാമി അയ്യരെ കിഴക്കേ ഗോപുരം മുതല്‍ അകമ്പടിയേകിയത് ശിവശങ്കരപ്പണിക്കരുടെ നാദസ്വരമേളത്തോടെ ആയിരുന്നു.

നാദസ്വര വായന ഇഷ്ടപ്പെട്ട സര്‍ സി.പി അന്ന് ഇരുപതു രൂപ ദക്ഷിണ ആയി നല്‍കിയത്  ഓര്‍മ്മകളില്‍ ഇന്നും മായാതെ കിടക്കുന്നു.

1714ല്‍ അഗ്‌നിബാധ മൂലം നശിച്ച ചെങ്ങന്നൂര്‍ മഹാദേവ ക്ഷേത്രത്തിന്റെ കിഴക്കേ ഗോപുരത്തിന്റെ 1934ല്‍ ആരംഭിച്ച പുനര്‍ നിര്‍മ്മാണം നേരില്‍ കണ്ട അപൂര്‍വ്വ വ്യക്തികളില്‍ ഒരാളാണ് ശിവശങ്കര പണിക്കര്‍. 1938ലാണ് പണികള്‍ പൂര്‍ത്തിയായത്.