വൈക്കം▪️ ശരീരം കൊണ്ട് രണ്ടാണെങ്കിലും ചിന്തകൊണ്ട് താനും പിണറായി വിജയനും ഒന്നാണ്. വൈക്കം കേരളത്തിലാണെങ്കിലും തമിഴ്‌നാടിനും ഏറെ പ്രിയപ്പെട്ടതാണ്. വൈക്കം സത്യഗ്രഹം കേരളത്തിന് മാത്രമല്ല, ഇന്ത്യയിലെ തന്നെ ഏറ്റവും വലിയ പോരാട്ടമാണ്. സാമൂഹിക രാഷ്ട്രീയ മാറ്റങ്ങള്‍ ഉണ്ടാകാന്‍ പ്രധാന പങ്ക് വഹിച്ചു. വൈക്കത്ത് വരാന്‍ സാധിച്ചതില്‍ അഭിമാനമുണ്ടെനും തമിഴ്‌നാട് മുഖ്യമന്ത്രി എം.കെ സ്റ്റാലിന്‍ പറഞ്ഞു.
വൈക്കം സത്യഗ്രഹത്തിന് നേതൃത്വം നല്‍കിയ എല്ലാവരെയും ഓര്‍ക്കുന്നു. തമിഴ്‌നാട്ടില്‍ നിന്നും പെരിയോരും കേരളത്തില്‍ നിന്നും ടി.കെ മാധവനും ചേര്‍ന്ന് നടത്തിയ പോരാട്ടമാണ്. ഒരു ഘട്ടത്തില്‍ സമരം അവസാനിപ്പിക്കേണ്ടി വരുമെന്ന് ആളുകള്‍ കരുതി. അപ്പോഴാണ് പെരിയൊര്‍ എത്തുന്നതെന്നും
കേരളത്തില്‍ ഉടനീളം പെരിയൊര്‍ വൈക്കം സമരത്തിനായി സംസാരിച്ചുവെന്നും അദ്ദേഹം ഓര്‍മിപ്പിച്ചു.
വൈക്കം സത്യഗ്രഹ ശതാബ്ദി ആഘോഷങ്ങളുടെ സംസ്ഥാനതല ഉദ്ഘാടനം മുഖ്യമന്ത്രി പിണറായി വിജയനും തമിഴ്‌നാട് മുഖ്യമന്ത്രി എം.കെ. സ്റ്റാലിനും ചേര്‍ന്നു നിര്‍വഹിച്ചു. സംസ്ഥാന സര്‍ക്കാരിനു വേണ്ടി സംസ്‌കാരിക വകുപ്പിന്റെ നേതൃത്വത്തില്‍ സംഘടിപ്പിക്കുന്ന 603 ദിവസം നീളുന്ന പരിപാടികള്‍ക്കാണ് ഇന്ന് തുടക്കം കുറിച്ചത്.
