തിരുവനന്തപുരം ▪️ബിബിസി ഡോക്യുമെന്ററിയുമായി ബന്ധപ്പെട്ട വിവാദത്തില്‍ അനില്‍ ആന്റണിയുടെ രാജിയെ കൂട്ടത്തോടെ സ്വാഗതം ചെയ്തും കൂടുതല്‍ നടപടി ആവശ്യപ്പട്ടും സംസ്ഥാനത്തെ യൂത്ത് കോണ്‍ഗ്രസ് നേതാക്കള്‍.
ബിബിസി ഡോക്യുമെന്ററി ഇന്ത്യയുടെ പരമാധികാരത്തെ ബാധിക്കില്ലെന്ന് പറഞ്ഞ് അനിലിനെ ശശി തരൂരും തള്ളി. പ്രതികരിക്കാതെ ഒഴിഞ്ഞെങ്കിലും അനില്‍ വിവാദം എകെ ആന്റണിയുടെ പ്രതിച്ഛായക്ക് പോലും മങ്ങലേല്‍പ്പിച്ചു.
ബിബിസി ഡോക്യുമെന്ററി ഉയര്‍ത്തി ദേശീയ സംസ്ഥാന തലത്തില്‍ ബിജെപിയെ നേരിടുന്നതിനിടെയാണ് അനില്‍ ആന്റണിയുടെ നിലപാട് കോണ്‍ഗ്രസ്സിനെ കടുത്ത വെട്ടിലാക്കിയത്. അനിലിന്റെ ബിജെപി അനുകൂല ട്വീറ്റ് ദേശീയ തലത്തില്‍ ചര്‍ച്ചയായതോടെ ആന്റണിയുടെ മകനാണെന്നൊന്നും നേതാക്കള്‍ നോക്കിയില്ല.
ഇന്നലെ കോണ്‍ഗ്രസ് യൂത്ത് കോണ്‍ഗ്രസ് നേതാക്കള്‍ അനിലിനെതിരെ പരസ്യ നിലപാടെടുത്ത് രംഗത്ത് വന്നിരുന്നു. കെപിസിസി അധ്യക്ഷന്‍ കെ സുധാകരന്‍ വരെ തള്ളിപ്പറഞ്ഞിട്ടും അനില്‍ നിലപാടില്‍ ഉറച്ചു നിന്നതോടെ നേതാക്കള്‍ കൂടുതല്‍ അതൃപ്തിയോടെ രംഗത്ത് വന്നു. നടപടി കൂടിയേ തീരൂവെന്ന് നേതാക്കള്‍ നിലപാട് ശക്തമാക്കുന്നതിനിടെയാണ് എല്ലാ സ്ഥാനങ്ങളും അനില്‍ ആന്റണി രാജിവെച്ചത്.
അനില്‍ രാജിവെച്ചതോടെ തത്കാലത്തേക്ക് കൂടുതല്‍ പരിക്കേല്‍ക്കാതെ വിവാദത്തില്‍ നിന്ന് രക്ഷപ്പെട്ടെന്ന ആശ്വാസത്തിലാണ് സംസ്ഥാനത്തെ കോണ്‍ഗ്രസ് പാര്‍ട്ടി. എന്നാല്‍ അനില്‍ ആന്റണിക്കെതിരെ രാജി പോരെന്നും ശക്തമായ നടപടി വേണമെന്നും യൂത്ത് കോണ്‍ഗ്രസ് നേതാക്കളായ ഷാഫി പറമ്പിലും റിജില്‍ മാക്കുറ്റിയുമെല്ലാം ആവശ്യപ്പെടുന്നു.
അനിലിന്റെ നിയമന സമയത്ത് യൂത്ത് കോണ്‍ഗ്രസ്സില്‍ കടുത്ത അമര്‍ഷമുണ്ടായിരുന്നു. എ.കെ ആന്റണി ദില്ലിയില്‍ കരുത്തനായതിനാല്‍ നേതാക്കള്‍ എതിര്‍പ്പുകള്‍ ഉള്ളിലൊതുക്കുകയായിരുന്നു. എ.കെ ആന്റണി ദില്ലിവിട്ട് കേരളത്തിലേക്ക് മടങ്ങിയതോടെയാണ് അനിലിനെതിരെ കൂട്ടത്തോടെ എല്ലാവരും നിലപാട് കടുപ്പിച്ചത്.
സുപ്രീം കോടതി വിധിയോടെ ഗുജറാത്ത് കലാപവിവാദം അടഞ്ഞ അധ്യായമെന്ന നിലപാടെടുത്ത ശശി തരൂരും അനിലിനെതിരെ നിലപാടെടുത്തു. അനിലിന്റെ വാദങ്ങളെല്ലാം അദ്ദേഹം നിഷേധിച്ചു. അനിലിന് മാത്രമല്ല വിവാദം ദോഷമുണ്ടാക്കിയത്.
എന്നും ബിജെപിയെ ശത്രുപക്ഷത്ത് നിര്‍ത്തുന്ന എകെ ആന്റണിക്കും മകന്റെ ബിജെപി അനുകൂല നിലപാട് വഴി പ്രതിച്ഛായ നഷ്ടമുണ്ടായി. ഇനി പ്രചരിക്കുന്ന അഭ്യൂഹങ്ങള്‍ ശരിവെച്ച് അനില്‍ ആന്റണി ബിജെപിയോട് അടുത്താല്‍ അത് അദ്ദേഹത്തിന്റെ അച്ഛന്‍ എ.കെ ആന്‍ണിക്കും കോണ്‍ഗ്രസിനും വന്‍ പ്രഹരമാകും.
