
ചെങ്ങന്നൂര് ഉറങ്ങിക്കിടന്ന ജ്യേഷ്ഠനെ അനുജന് കഴുത്ത് ഞെരിച്ച് കൊലപ്പെടുത്തിയത് മുന്വൈരാഗ്യം മൂലം. കൊലപാതകത്തിന് മുന്പ് ഉറങ്ങിയെന്ന് ഉറപ്പാക്കാന് ഹെല്മെറ്റ് തറയിലിട്ട് ശബ്ദമുണ്ടാക്കിയെന്ന് പ്രതിയുടെ വെളിപ്പെടുത്തല്.
ചെങ്ങന്നൂര് മാര്ത്തോമാ ഒലിവറ്റ് അരമനയ്ക്ക് സമീപം തിട്ടമേല് ചക്രപാണി യുഴത്തില് പി.ജെ ശ്രീധരന്റെ മകന് പ്രസന്നന് (47) നെ കൊലപ്പെടുത്തിയ സംഭവത്തില് തെളിവെടുപ്പിന് എത്തിച്ചപ്പോഴാണ് അനുജന് പ്രസാദ് (45) കൊലപാതകം മുന്വൈരാഗ്യം മൂലമാണെന്ന് വെളിപ്പെടുത്തിയത്.
ഞായറാഴ്ച രാവിലെ 3 മണിയോടെയായിരുന്നു സംഭവം. സംഭവത്തില് ഓട്ടോറിക്ഷാ ഡ്രൈവറായ പ്രസാദിനെ രാവിലെ ചെങ്ങന്നൂര് പൊലിസ് അറസ്റ്റ് ചെയ്തിരുന്നു.
ഇരുവരും തമ്മില് നിരന്തരമായി നടന്ന കലഹത്തിന്റെ തുടര്ച്ചയായി കയര് ഉപയോഗിച്ച് കഴുത്ത് ഞെരിച്ചാണ് കൊലപ്പെടുത്തിയതെന്ന് പോലീസ് പറഞ്ഞു. ഏറെ നാളായി ഇരുവരും തമ്മില് നടന്നു വരുന്ന കലഹത്തിന്റെ തുടര്ച്ചയാണ് കൊലപാതകത്തില് കലാശിച്ചത്.
ആറുമാസം മുമ്പ് ഇവര് തമ്മില് മദ്യപിച്ച് വഴക്കിടുകയും മര്ദ്ദനത്തിനിടെ പ്രസാദിന്റെ കാല് ഒടിഞ്ഞ് ആശുപത്രിയില് കിടത്തി ചികിത്സ വേണ്ടി വരികയും ചെയ്തിരുന്നു. ഇതിനും ശേഷം ഇരുവരും കൂടുതല് ശത്രുതയിലായിരുന്നു.
ശനിയാഴ്ചയും ഇരുവരും തമ്മില് വഴക്കുണ്ടായി. തുടര്ന്ന് വീടുവിട്ടു
പുറത്തുപോയ പ്രസന്നന് ഞായറാഴ്ച പുലര്ച്ചെ രണ്ടു മണിയോടെയാണ് വീട്ടിലെത്തിയത്. മദ്യലഹരിയിലായിലായിരുന്ന പ്രസന്നന് മുറിയില് കയറി കട്ടിലിനുതാഴെ തറയില് കിടന്ന് ഉറങ്ങിപ്പോയി.
ഉറക്കത്തിലായോ എന്ന് ഉറപ്പിക്കാനായി പ്രസാദ് ഹെല്മെറ്റ് തറയില് ഇട്ട് ശബ്ദം ഉണ്ടാക്കി. ഉറങ്ങിയെന്ന് മനസിലായപ്പോഴാണ് പ്ലാസ്റ്റിക് കയര് ഉപയോഗിച്ച് കഴുത്ത് ഞെരിച്ച് കൊലപ്പെടുത്തിയത്. ഇതിന് ശേഷം കയര് ഒളിപ്പിച്ചു വച്ചു.
ചെങ്ങന്നൂര് എസ്എച്ച്ഒ എ.സി വിപിന്റെ നേതൃത്വത്തിലുള്ള അന്വേഷണത്തില് കഴുത്തിലെ പാട് കണ്ടതോടെയാണ് മരണം കൊലപാതകമാണോ എന്ന സംശയത്തിലെത്തിയത്. തുടര്ന്നുള്ള ചോദ്യം ചെയ്യലില് പ്രതി കുറ്റം സമ്മതിച്ചു.
നിരന്തരം ഇവര് തമ്മില് മദ്യപിച്ച് വഴക്കിടുകയും പ്രസന്നനെ മര്ദ്ദിക്കുകയും ചെയ്യുന്നതിനാല് പ്രസാദിനെ ഭയന്ന് പ്രസന്നന് രാത്രി വൈകിയാണ് വീട്ടില് എത്തുന്നത്. വീടിന്റെ രണ്ടു ഭാഗങ്ങളിലായാണ് പ്രസാദും അവിവാഹിതനായ പ്രസന്നനും താമസിച്ചിരുന്നത്.
നേരം പുലര്ന്നപ്പോള് പ്രസന്നനെ മുറിയില് മരിച്ച നിലയില് പിതാവ് ശ്രീധരനാണ് കണ്ടത്. സംഭവ സ്ഥലത്തെത്തിച്ച് തെളിവെടുപ്പ് നടത്തിയ പ്രതിയെ തിങ്കളാഴ്ച കോടതിയില് ഹാജരാക്കും. പരേതയായ കുഞ്ഞമ്മയാണ് മാതാവ്.
ഇവരുടെ മറ്റൊരു സഹോദരനെ ഒരു വര്ഷം മുമ്പ് ആത്മഹത്യ ചെയ്ത നിലയില് കണ്ടെത്തിയിരുന്നു. എന്നാല് ഇതില് എന്തെങ്കിലും ദുരൂഹതയുള്ളതായി ഇപ്പോള് സംശയിക്കുന്നില്ലെന്നും പോലീസ് പറഞ്ഞു.