കോട്ടയം ▪️ പാര്‍ക്കിങ്ങിനെ ചൊല്ലി ഉണ്ടായ തര്‍ക്കവുമായി ബന്ധപ്പെട്ട് യുവാക്കളെ വെട്ടി കൊലപ്പെടുത്താന്‍ ശ്രമിച്ച കേസില്‍ സഹോദരങ്ങളെ പോലീസ് അറസ്റ്റ് ചെയ്തു.
ചെങ്ങളം സൗത്ത് വടശ്ശേരില്‍ വീട്ടില്‍ (നിലവില്‍ മുട്ടമ്പലം ചില്‍ഡ്രന്‍സ് പാര്‍ക്കിന് സമീപം വാടകയ്ക്ക് താമസം) അരുണ്‍ സക്കറിയ (31), ഇയാളുടെ സഹോദരന്‍ ബ്രിജിത്ത് സക്കറിയ (35) എന്നിവരെയാണ് കോട്ടയം ഈസ്റ്റ് പോലീസ് അറസ്റ്റ് ചെയ്തത്.
ഇവര്‍ ഇരുവരും ചേര്‍ന്ന് കഴിഞ്ഞദിവസം ഉച്ചയ്ക്ക് 12:30 മണിയോടുകൂടി പുതുപ്പള്ളി ഏറികാട് ഭാഗത്തുള്ള യുവാവിനെയും, സുഹൃത്തുക്കളെയും കട്ടിംഗ് കത്തി ഉപയോഗിച്ച് വെട്ടി കൊലപ്പെടുത്താന്‍ ശ്രമിക്കുകയായിരുന്നു.
ഇവര്‍ വാടകയ്ക്ക് താമസിക്കുന്ന കോട്ടയം കളക്ടറേറ്റിന് സമീപത്തുള്ള ചില്‍ഡ്രന്‍സ് പാര്‍ക്കിന് സമീപം ഇവരുടെ വീടിനു മുന്‍വശത്തായി യുവാക്കള്‍ വെല്‍ഡിങ് ആവശ്യങ്ങള്‍ക്കായി കൊണ്ടുവന്ന വാഹനവും ഇരുമ്പ് സ്‌ക്വയര്‍ പൈപ്പുകളും കൊണ്ടുവന്നിട്ടതിനാല്‍ ഇവരുടെ വാഹനം എടുക്കുന്നതിന് തടസ്സം നേരിട്ടു.
തുടര്‍ന്ന് ഇവര്‍ തമ്മില്‍ വാക്ക് തര്‍ക്കം ഉണ്ടാവുകയും തുടര്‍ന്ന് ഇവര്‍ യുവാക്കളെ മര്‍ദ്ദിക്കുകയും, കയ്യില്‍ കരുതിയിരുന്ന കട്ടിങ് കത്തി ഉപയോഗിച്ച് വെട്ടി കൊലപ്പെടുത്താന്‍ ശ്രമിക്കുകയുമായിരുന്നു.
പരാതിയെ തുടര്‍ന്ന് കോട്ടയം ഈസ്റ്റ് പോലീസ് കേസ് രജിസ്റ്റര്‍ ചെയ്യുകയും, ഇരുവരെയും പിടികൂടുകയുമായിരുന്നു.
അരുണ്‍ സക്കറിയക്ക് കുമരകം, കോട്ടയം ഈസ്റ്റ്, ഗാന്ധിനഗര്‍ എന്നീ സ്‌റ്റേഷനുകളില്‍ ക്രിമിനല്‍ കേസുകള്‍ നിലവിലുണ്ട്.
കോട്ടയം ഈസ്റ്റ് സ്റ്റേഷന് എസ്.എച്ച്.ഓ ഷിജു പി.എസ്, എസ്.ഐമാരായ അരുണ്‍ കുമാര്‍, അനില്‍കുമാര്‍, സി.പി.ഓ മാരായ യേശുദാസ്, ഗിരീഷ് കുമാര്‍,അനൂപ് എന്നിവര്‍ ചേര്‍ന്നാണ് ഇവരെ അറസ്റ്റ് ചെയ്തത്. കോടതിയില്‍ ഹാജരാക്കിയ ഇരുവരെയും റിമാന്‍ഡ് ചെയ്തു.
