തിരുവനന്തപുരം▪️ ചുമതലേയേറ്റെടുക്കുന്നതിന് മുന്‍പായി മുതിര്‍ന്ന കോണ്‍ഗ്രസ് നേതാവ് എ.കെ ആന്റണിയെ കണ്ട് പുതിയ കെപിസിസി നേതൃത്വം.
നിയുക്ത അധ്യക്ഷന്‍ സണ്ണി ജോസഫ്, വര്‍ക്കിങ് പ്രസിഡന്റുമാരായ ഷാഫി പറമ്പില്‍, പി.സി വിഷ്ണുനാഥ്, എ.പി അനില്‍കുമാര്‍, യുഡിഎഫ് കണ്‍വീനര്‍ അടൂര്‍ പ്രകാശ് എന്നിവരാണ് എ.കെ ആന്റണിയുടെ വീട്ടിലെത്തി അനുഗ്രഹം വാങ്ങിയത്.
യുഡിഎഫിനെയും കോണ്‍ഗ്രസിനെയും ശക്തിപ്പെടുത്തുന്നതിനോടൊപ്പം എല്ലാ ജനവിഭാഗങ്ങളേയും കൂട്ടിയിണക്കാന്‍ കഴിഞ്ഞാല്‍ സണ്ണി ജോസഫിന് മികച്ച വിജയം നേടാനാകുമെന്ന് എ.കെ ആന്റണി ആശംസിച്ചു.
താന്‍ കേരളത്തില്‍ ഏറ്റവും കൂടുതല്‍ ഇഷ്ടപ്പെടുന്ന രണ്ട് വിഭാഗങ്ങള്‍ തീരദേശ, മലയോര ജനങ്ങളാണ്. കേരളത്തില്‍ കോണ്‍ഗ്രസിന്റെ ചരിത്രത്തില്‍ ആദ്യമായി ഒരു മലയോര കര്‍ഷകന്റെ പുത്രന്‍ കെപിസിസി പ്രസിഡന്റായിരിക്കുന്നു.
കേരളമെമ്പാടും മലയോര മേഖലയിലെ ജനങ്ങള്‍ പ്രതിസന്ധി നേരിടുമ്പോള്‍ സണ്ണി ജോസഫിന്റെ നിയമനം അവര്‍ക്ക് കൂടുതല്‍ കരുത്ത് നല്‍കുമെന്നും എ കെ ആന്റണി പറഞ്ഞു.
