കൊച്ചി▪️ വിമാനത്താവളത്തെ വിമാനക്കമ്പനിയുടെ ഹബ്ബായി എയര്‍ കേരള ചെയര്‍മാന്‍ അഫി അഹമദ് പ്രഖ്യാപിച്ചു
കൊച്ചി എയര്‍ കേരളയുടെ ആദ്യ സര്‍വീസ് ജൂണില്‍ കൊച്ചി അന്താരാഷ്ട്ര വിമാനത്താവളത്തില്‍ നിന്ന് ആരംഭിക്കും.
കൊച്ചി വിമാനത്താവളത്തെ വിമാനക്കമ്പനിയുടെ ഹബ്ബായി എയര്‍ കേരള ചെയര്‍മാന്‍ അഫി അഹമദ് പ്രഖ്യാച്ചു. 76 സീറ്റുകളുള്ള എടിആര്‍ വിമാനങ്ങളാണ് സര്‍വീസിന് ഉപയോഗിക്കുന്നത്. എല്ലാം ഇക്കണോമിക് സീറ്റുകളായിരിക്കും.
ആദ്യഘട്ടത്തില്‍ അഞ്ച് വിമാനങ്ങളാണ് സര്‍വീസ് നടത്തുക. വിമാനങ്ങള്‍ പാട്ടത്തിനെടുത്താണ് സര്‍വീസ് നടത്തുന്നത്. അള്‍ട്രാ ലോ കോസ്റ്റ് വിമാന സര്‍വീസുകളാണ് കമ്പനി നടത്തുകയെന്ന് ചെയര്‍മാന്‍ പറഞ്ഞു. ദക്ഷിണ, മധ്യ ഇന്ത്യയിലെ ചെറുകിട നഗരങ്ങളെ മെട്രോ നഗരങ്ങളുമായി ബന്ധിപ്പിച്ചായിരിക്കും എയര്‍ കേരള സര്‍വീസുകള്‍ നടത്തുന്നതെന്ന് സിഇഒ ഹരീഷ് കുട്ടി അറിയിച്ചു.
പാട്ടത്തിനെടുക്കുന്ന വിമാനങ്ങളില്‍ ആദ്യത്തേത് ഏപ്രിലില്‍ കൊച്ചിയിലെത്തും. വിമാന ജീവനക്കാരില്‍ ഭൂരിഭാഗവും മലയാളികളായിരിക്കുമെന്നാണ് ചെയര്‍മാന്‍ പറഞ്ഞത്.
എയര്‍ കേരള സര്‍വീസ് തുടങ്ങി രണ്ട് വര്‍ഷം കൊണ്ട് വിമാനങ്ങളുടെ എണ്ണം 20 ആക്കി വര്‍ധിപ്പിക്കാനാണ് തീരുമാനം. പിന്നാലെ വിദേശ സര്‍വീസുകള്‍ തുടങ്ങാനും എയര്‍ കേരള പദ്ധതിയിടുന്നുണ്ട്. ഗള്‍ഫ് മേഖലയിലായിരിക്കും ആദ്യ വിദേശ സര്‍വീസ്.
കുറഞ്ഞ ടിക്കറ്റ് നിരക്കും സമയ ബന്ധിതമായ സര്‍വീസും എയര്‍ കേരളയില്‍ മലയാളികള്‍ക്ക് പ്രതീക്ഷകളേറെയാണ്. സംസ്ഥാനത്തിന്റെ ടൂറിസം മേഖലയ്ക്ക് സംരംഭം വലിയ സാധ്യതകള്‍ തുറക്കുമെന്ന പ്രതീക്ഷയാണ് ഉള്ളതെന്ന് മന്ത്രി പി. രാജീവ് പറഞ്ഞു.
പ്രഖ്യാപന ചടങ്ങില്‍ മന്ത്രി പി. രാജീവാണ് അധ്യക്ഷനായി. എംപിമാരായ ഹൈബി ഈഡന്‍, ഹാരിസ് ബീരാന്‍, അനവര്‍ സാദത്ത് എംഎല്‍എ, എയര്‍പോര്‍ട്ട് ഡയറക്ടര്‍ ജി. മനു, എയര്‍ കേരള വൈസ് ചെയര്‍മാന്‍ അയൂബ് കല്ലട, ചീഫ് ഫിനാന്‍ഷ്യല്‍ ഓഫീസര്‍ കീര്‍ത്തി റാവു, ഓപ്പറേഷന്‍സ് ഹെഡ് ഷാമോന്‍ സയിദ് മുഹമ്മദ് തുടങ്ങിയവര്‍ സംസാരിച്ചു.
