തിരുവനന്തപുരം ▪️ മാധ്യമപ്രവര്‍ത്തകരോട് മോശമായി പെരുമാറിയ മുഖ്യമന്ത്രിയുടെ ശാസ്ത്ര ഉപദേഷ്ടാവ് എം.സി ദത്തനെ പുറത്താക്കണമെന്ന് തിരുവനന്തപുരം പ്രസ് ക്ലബ്.
മാധ്യമപ്രവര്‍ത്തകരോട് തെണ്ടാന്‍ പോകാന്‍ ഉപദേശിക്കുന്ന ദത്തന്‍ കേരളത്തിന് അപമാനമാണെന്ന് പ്രസ് ക്ലബ് കുറ്റപ്പെടുത്തി.
പരാമര്‍ശം പിന്‍വലിച്ച് മാധ്യമ സമൂഹത്തോട് മാപ്പ് പറയാന്‍ ദത്തന്‍ തയ്യാറാകണമെന്നും ആവശ്യപ്പെട്ടു. പ്രതിപക്ഷത്തിന്റെ ഉപരോധം കാരണം സെക്രട്ടറിയേറ്റില്‍ കടക്കാനാവാതെ തെരുവിലൂടെ നടന്ന ദത്തനോട് പ്രതികരണം ആരാഞ്ഞ മാധ്യമപ്രവര്‍ത്തകരെയാണ് മറ്റു പണിയൊന്നുമില്ലെങ്കില്‍ തെണ്ടാന്‍ പോകാന്‍ ഉപദേശിച്ചത്.
തൊഴിലില്ലാത്ത ചെറുപ്പക്കാരെല്ലാം തെണ്ടാന്‍ പോകണമെന്ന സന്ദേശമാണ് മുഖ്യമന്ത്രിയുടെ ശാസ്ത്ര ഉപദേഷ്ടാവ് നല്‍കുന്നത്. ഇത്തരമൊരാളില്‍ നിന്ന് ഉപദേശം സ്വീകരിക്കുന്ന മുഖ്യമന്ത്രി അപകടത്തില്‍ ചെന്ന് ചാടും.
റിട്ടയര്‍ ചെയ്തതിനുശേഷം ചില നേതാക്കളുടെ പാദസേവ ചെയ്ത് യുവാക്കളുടെ തൊഴിലവസരങ്ങള്‍ തട്ടിയെടുത്ത് ഉപദേഷ്ടാവായി ലക്ഷങ്ങള്‍ ശമ്പളം പറ്റുന്ന ദത്തനാണ്, മാന്യമായി മാധ്യമപ്രവര്‍ത്തനം നടത്തുന്നവരോട് തെണ്ടാന്‍ പോകണമെന്ന് പുലഭ്യം പറയുന്നത്.
മാധ്യമ പ്രവര്‍ത്തകരെയും ജനാധിപത്യ സമൂഹത്തെയും അപമാനിച്ച ദത്തനെ മുഖ്യമന്ത്രിയുടെ ശാസ്ത്ര ഉപദേഷ്ടാവ് സ്ഥാനത്തു നിന്ന് പുറത്താക്കണമെന്ന് പ്രസ് ക്ലബ് പ്രസിഡന്റ് എം. രാധാകൃഷ്ണനും സെക്രട്ടറി കെ.എന്‍. സാനുവും ആവശ്യപ്പെട്ടു.
