ചെങ്ങന്നൂര്‍▪️ ജില്ലാ സ്‌റ്റേഡിയത്തിന്റെ പുനര്‍നിര്‍മ്മാണത്തിനായി 33 കോടി രൂപ ധനവകുപ്പ് അനുവദിച്ചതായി മന്ത്രി സജി ചെറിയാന്‍ അറിയിച്ചു.
ദേശീയ സരസ് മേളയുടെ സമാപന സമ്മേളനത്തിലാണ് ആയിരങ്ങളെ സാക്ഷിയാക്കി സ്റ്റേഡിയം നിര്‍മ്മാണം ആരംഭിക്കുന്ന വിവരം അറിയിച്ചത്. മന്ത്രിയുടെ പ്രഖ്യാപനം ഹര്‍ഷാരവത്തോടെയാണ് ജനങ്ങള്‍ സ്വീകരിച്ചത്.
14ന് നിര്‍മ്മാണത്തിനുള്ള ടെന്‍ഡര്‍ നടപടികള്‍ നടക്കും. 65% പണികള്‍ പൂര്‍ത്തീകരിച്ചു കഴിഞ്ഞുവെന്നും ഒരു വര്‍ഷത്തിനുള്ളില്‍ നിര്‍മ്മാണം പൂര്‍ത്തിയാക്കി കായിക മാമാങ്കത്തിനായി സ്റ്റേഡിയം പൊതുജനങ്ങള്‍ക്ക് തുറന്നു കൊടുക്കുമെന്നും അദ്ദേഹം പറഞ്ഞു.
നിര്‍മ്മാണത്തിന് മുന്‍പായി ഏപ്രില്‍ 11 മുതല്‍ 18 വരെ സംസ്ഥാന തലത്തിലുള്ള ഫുട്‌ബോള്‍ ടൂര്‍ണമെന്റ്് സ്‌റ്റേഡിയത്തില്‍ നടത്തും. കേരളത്തിലെ പ്രമുഖ ടീമുകള്‍ പങ്കെടുക്കുന്ന ടൂര്‍ണമെന്റില്‍ ഒരു ദിവസം വനിത ടീമുകളുടെ മല്‍സരവും നടക്കുമെന്നും മന്ത്രി പറഞ്ഞു.
8 ലൈന്‍ 400 മീറ്റര്‍ സിന്തറ്റിക് ട്രാക്ക്, 11 പേര്‍ക്ക് കളിക്കാവുന്ന ഫുട്‌ബോള്‍ ഗ്രൗണ്ട്, ലോംഗ്ജംപ്, ട്രിപ്പിള്‍ ജംപ് പിറ്റുകള്‍, ഒളിമ്പിക്‌സ് നിലവാരത്തിലുള്ള സ്വിമ്മിംഗ് പൂള്‍, മേപ്പിള്‍ വുഡ് പാകിയ ഇന്‍ഡോര്‍ സ്റ്റേഡിയം, ഹോക്കി കോര്‍ട്ട്, ഔട്ട് ഡോര്‍ കോര്‍ട്ട്, ജിംനേഷ്യം, കളിക്കാര്‍ക്കുള്ള മുറികള്‍, ഗസ്റ്റ് റൂമുകള്‍, ഹോസ്റ്റലുകള്‍ എന്നിവയാണ് ഉള്‍പ്പെടുത്തയിരിക്കുന്നത്.
